Un ano máis, os nenos e nenas de Segundo de Primaria, visitamos a Casa das Ciencias e o Planetario. Encantounos poder gozar da física, as matemáticas, a astronomía, a bioloxía,… e facernos preguntas a partires da experimentación e a observación directa. Este curso, estivemos acompañadas e acompañados por dúas monitoras excepcionais que se prestaron en todo momento a dar respostas ás nosas dúbidas.
No Planetario, fixeron un pase especial para nós, ensináronnos o ceo tal e como estaba ese día e fomos quen de identificar astros que vemos brillar á cotio, coñecer os seus nomes e situalos nas constelacións. Lembramos datos da mitoloxía grega, que aprendemos no pasado trimestre, e que tanta relación teñen coas denominacións das constelacións.
Logo, xa que non chovía, reunímonos coas compañeiras e compañeiros que visitaran os outros museos científicos da Coruña. Tivemos un xantar moi divertido!!. Regresamos a Lugo cheiñas e cheiños de saberes…
